Nasapwan ang bangkay sang lalaki nga naputos sang duct tape sa kilid sang dalan sa Prk Langka, Brgy Pacol, Bago City alas-10:30 kaina sang aga, Hulyo 2, 2026.
Tubtob sa karun wala pa matumod ang identity sang biktima.
Sa interview sang Bombo Radyo Bacolod kay Alyas Juvelyn, residente sa lugar, ang lawas ang nasapwan sang driver sang truck nga nagdeliver sang abono para sa tubo.
Sa inisyal nga imbestigasyon sang Bago City Police Station, nakapanimaho sang naga-usbong nga baho ang 38 anyos nga driver nga residente sang La Castellana, gani ginpangita sini ang source.
Gintawag man sini sanday Juvelyn agud kumpirmahon kun tawo gid man ukon sapat ang naputos sang duct tape.
Sa description nga ginpagwa sang kapulisan, ang biktima ang ginabanta nga yara sa 30 tubtob 40 anyos, 5-foot-5 ang kataason, may tattoo nga “Prince GABREL” sa natuo nga butkon kag rose tattoo sa natuo nga kamot, nakasuksok sang puti nga t-shirt nga may print inscription sa likod nga “TRENDIANO – Make Your Dream Stay Big,” yellow nga shorts, PETROL brand nga maong pants, may pilas sa agtang, nakabaklid sa likod ang mga kamot kag ginhigtan sang wire, ginputos sang pink nga duct tape sa liog , ginputos sa habol ang bilog nga lawas, kag ginsecure gamit ang packaging tape.
Suno kay Juvelyn, indi gid gilayon makita sa highway ang bangkay bangod kantilado ang duta kag ini ang natabunan sang bungyod sang mga hilamon kag pila ka kahoy.
Samtang nakakuha man sang impormasyon ang Bombo News Team nga may nakita nga salakyan nga nakapark malapit sa area sang Lunes sang gab-i.
