Duha sa apat ka mga baboy nga nagpositibo sa African Swine Fever (ASF) ang nagikan sa Barangay Taculing sa ciudad sang Bacolod.
Sa interview sang Bombo Radyo kay Janet Recto, Chief Tanod nga in charge sa ASF complaints, gipahayag sini nga nagpadulong ang tag-iya sang baboy sa City Veterinary Office agud magpamangkot kun ano ang dapat himuon sa baboy nga galain ang pamatyag.
Suno diri, ginkadtuan ni Dr. Agueda dela Torre ang balay agud kuhaan sang blood samples ang baboy kag matapos ang duha ka adlaw, didto na ginpahibalo ang tag-iya nga ang iya duha ka baboy ang positibo sa ASF.
Suno kay Recto, pito tanan ang baboy sang tag-iya, anum diri ang fattening kag isa manugbata nga nayon.
Pahayag sini nga iban sini nga mga baboy ang ginpaidalom sa blood testing kag ginahulat pa ang result.
Suno kay Recto, ginhambalan man ini nga kun maglain ang pamatyag sa iya mga baboy gilayon nga i-report sa City Veterinary Office.
Pahayag sini nga nalubong na ang baboy nga nagpositibo sa ASF kag padayon ang pag-monitor sa lugar.
