Nagpasalig si Tourism Infrastructure and Enterprise Zone Authority (TIEZA) Chief Operating Officer (COO) Mark Lapid nga padasigon ang pagkay-o sa Bacolod City Public Plaza kag Bacolod City Government Center Fountain.
Suno kay Bacolod City Mayor Greg Gasataya, sa ginpatigayon nga pakigsapol sang ciudad kag TIEZA sang nakaligad nga semana, nagpasalig si Lapid nga sa ikatatlo nga semana sa bulan sang Setyembre matapos ang nasambit nga proyekto.
Suno kay Gasataya, sa katapusan nga semana sang Agosto magasugod na ang TIEZA sa commissioning lakip na diri ang pag-test sa mga suga, sound kag fountain agud mahibaluan kun may kinahanglan pa nga kay-uhon ukon i-improve.
Matapos sini, i-turn over na sang TIEZA sa ciudad ang proyekto.
Nagpangayo man sang pabor si Gasataya nga butangan sang dugang nga tanom ang plaza agud ma-enclosed kag iban pa nga additional improvements antes ang selebrasyon sang Masskara Festival.
Dugang pa, ginahingyo man sini nga butangan sang dugang nga lightings kag landscaping ang palibot sang government center.
Nagpasalig man ang TIEZA nga sila ang maga-finance sa tanan nga sa power supply sa fountain.
Nahibaluan nga ang TIEZA ang may P300-million redevelopment project sa ciudad kun sa diin P220 million ang gin-alokar para sa renovation sa BCGC samtang P80-million sa pag-upgrade sang plaza.
