Nagdangat sa 474 ka pamilya ang nag-evacuate sa Negros Occidental bangud sa pagbaha tuga sang Bagyo Inday.
Sa interview sang Bombo Radyo kay OCD-NIR Director Donato Sermeno II, ginpahayag sini nga alas-7:00 kaina sang aga, siyam ka Barangay sa Negros Occidental ang may reported nga pagbaha nga madasig naman nga nagsubside.
Suno diri, may nakagaigo man nga food packs ang DSWD nga ipanagtag para sa mga evacuees nga yara sa 15 ka mga evacuation centers.
Suno kay Sermeno, santo sa forecast sang PAG-ASA subong nga adlaw maeksperyensyahan ang madamol nga pag-ulan tubtob bwas.
Dugang pa, wala sang reported nga landslides apang padayon ang pagmonitor sang mga otoridad ilabi na sa palibot sang Bulkan Kanlaon sa posible nga lahar flow.
Suno kay Sermeno, apisar nga pag pugtak-pugtak ang pag-ulan balantayan sa gihapon ang tubig nga nagapanaog gikan sa bukid.
Suno diri, kaangay sa natabo sang nakaligad nga Bagyo Tino kun sa diin wala ginalauman nga bahaon ang pila ka mga lugar.
Dugang pa, nagpatigayon man sang pre-evacuation ang pila ka mga Local Government Units (LGUs) lakip na ang San Carlos City kag Canlaon City nga apektado sa paglupok sang Bulkan Kanlaon.
Pahayag sini nga padayon ang pagmonitor sang mga otroridad kag pakigkoordinar sa mga LGUs para sa mga posible nga mga emerhensya ukon evacuation kag nagpanugyan sa publiko nga magsunod sa mga abiso sang LGU para sa kaluwasan sang tanan.Samtang….nagpahanumdom ang Weather Forecaster sang Negros Occidental Provincial Disaster Management Program Division sa mga pumuluyo nga naga-istar sa kilid sang mga suba, baybayon, kag bukid nga mag-aligmat sa posibilidad sang mga pagbaha ukon landslide.
Sa interview sang Bombo Radyo Bacolod kay Dave Cuajao, indi derekta nga apektado sang Bagyo INDAY ang Negros Occidental.
Apang sa pagpalayo sini sa Pilipinas, ginabutong man sang Bagyo ang Hangin Habagat nga amo ang nagatuga sang madamol nga mga pag-ulan.
Panugyan sini sa mga residente nga malapit sa suba kag baybayon nga panilagan ang lebel sang tubig.
Kun may-ara na sang pagbaha, indi na dapat hulaton pa nga magdangat sa liog antes magtawag sang rescue.
Panugyan ni Cuajao nga mag-evacuate sang temprano bangod ang mga rescue personnel ang indi na magrisgo sa pagrescue sa mga area nga delikado, bangod sila naman ang mahimo mabutang sang alang-alang.
Samtang ang buhawi nga nagluntad sa Hinigaran ang indi naman konektado sa Bagyo.
Suno diri, ang buhawi ang normal lamang nga hitabo ilabi na nga may ara sang thunderclouds… Sa pihak nga bahin, wala sang reported nga pagbaha sa ciudad sang Bacolod kasunod sa pag-ulan dala sang Habagat nga ginpabaskog ni Bagyong Inday.
Sa interview sang Bombo Radyo kay Bacolod City Disaster Risk Reduction and Management Office (DRRMO) Dr Anna Maria Laarni Pornan, ginpahayag sini nga nag-deploy kaina sang aga sang DRRMO personnel agud magtsekyar sa sitwasyon sang mga suba sa ciudad.
Suno diri, normal ang tanan nga lebel sang tubig sa mga suba lakip na diri ang Mandalagan Br. 1, Banago Br., Mambuloc Creek, Lupit Br. 1, Magsungay River, Cabalagnan Br., Pahanocoy 1 kag 2, kag Sum-ag River.
Dugang pa, activated naman ang mga DRRMO personnel sa tagsa ka mga brgy inkaso magdamol ang pagbubo sang pag-ulan.// Pahayag sini, lauman nga tubtob pa bwas ang pag-ulan.
Pahanumdom sini sa mga pumuluyo ilabi na sa yara sa mga low lying kag flood prone areas nga mag-aligmat kag maghanda sang go to bag agud indi mabudlayan kun inkaso magbakwit.
