‘No one is above the law’, ini ang ginpahayag sang Police Regional Office Negros Island Region (PRO NIR) sa press conference kasunod sa natukiban nga gina-alegar ginapanag-iyahan ni Negros Occidental 3rd District Board Member Andrew Montelibano ang propiedad nga ginagamit sa e-sabong operation sa Hda. Pilar, Brgy. Alicante, EB Magalona sang Miyerkules.
Suno kay PRO NIR Regional Director PBGen Romano Cardino, patas ang pagpatuman sa layi kag nagpasalig nga pasabton ang dapat manabat ano man ang status sini sa gobyerno.
Madumduman nga magaserbe kuntani ang mga otoridad sang warrant of arrest sa most wanted person nga nagatrabaho sa lugar.
Apang ginkakibot nila sang makita ang e-sabong facility.
Apat ka persona ang gin-aresto matapos mataktohan nga nagapatigayon sang e-sabong.
Suno diri, padayon ang imbestigasyon sang mga otoridad sa pagtumod kun ang propiedad ang ginapanag-iyahan ni Montellibano.
Suno kay Cardino, ginakabig subong si Montellibano bilang Person of Interest (POI) matapos makita nga yara sa palibot sang area sang ginserbe ang warrant of arrest samtang wala pa sang ebidensya nga siya ang nagapartisipar sa iligal nga buluhaton… Samtang, nagpasalig si Negros Occidental 3rd District Board Member Andrew Montelibano nga siya ang willing nga magkooperar sa imbestigasyon sa natukiban nga e-sabong operation sa sulod sang compound sa idalom sang ila korporasyon.
Sa interview sang Bombo Radyo Bacolod kay Montelibano, gikan ini sa Bacolod agud magbakal sang materyales para sa iya manukan kag pag-abot sa ila nga farm sa Hda. Pilar, Brgy. Alicante, EB Magalona halos duha ka minutos lang nga nauna sa iya ang kapulisan.
Naabtan niya nga ginapahapa na ang iya nga mga tinawo, kag sang ginpamangkot, ginpahayag sang kapulisan nga sila ang may ginalagas nga tatlo ka muslim nga pugante nga may mga armas.
Gilayon man sini gintugutan nga makasulod ang kapulisan kag ginpa-updan pa sa iya mga tinawo sa pagsecure sang mga exit points sa lugar.
Didto na kag nakit-an ang hayob-hayob nga ginhimo nga illegal e-sabong site.
Suno diri, ang punong ang kabahin sang Andrew Montelibano Corporation apang 2004 pa nila gin-abandonar, kag ini ang gindumalahan sang iya pakaisa nga si late EB Magalona Mayor David Lacson, kag ginsalo sang iya asawa sang ini ang nagtaliwan.
Suno kay Montelibano may nagpalapit sa ila sekretarya nga si certain Ricky para magrenta sang punong kag nagabayad lamang kada bulan.
Apang ang pagkalisensya nga ini ang himuon nga conditioning area para sa mga inugbulang nga manok.
Wala man sila sang written contract bangod sini kay Ricky sila ang isa tubtob duha ka bulan lamang magarenta, apang nagarenew lamang para magpadayun.
Suno kay Board Member Andrew, didto lang niya natukiban nga may e-sabong operation sa area bangod ini ang malayo sa iya farm.
Panindugan sini nga kun nakahibalo siya sa illegal nga aktibidad, ginpunggan na sini ang kapulisan kag ginpangitaan sang search warrant.
Suno diri, indi na niya kwestyonon ang indi husto nga proseso sa pagsulod sa ila lugar, sa baylo siya ang nagapasalamat pa nga natukiban kag nauntat ang illegal nga aktibidad.
Pasalig sini nga siya ang willing magkooperar sa imbestigasyon sang mga otoridad.
