“Not funding is not opposing,” ini ang paathag ni Negros Occidental Governor Eugenio Jose “Bong” Lacson sa desisyon sang provincial government nga maggamit sang ‘Green Solution’ sangsa magpatigayon sang ‘aerial spraying’ sang chemical pesticide batok sa red-striped soft scale insect (RSSI).
Sa interview sang Bombo Radyo Bacolod sa gobernador, apisar nga nagpahayag ini nga indi nila pondohan ang ginaduso sang United Sugar Producers Federation of the Philippines (UNIFED) nga aerial spraying sang systemic chemical, wala nagakahulugan nga sila ang nagapamalabag sa aktibidad.
Suno diri, palarehas lamang ang ila purpose nga mauntat ang kahalitan sang RSSI, apang lainlain lamang ang pamaagi.
Dugang pa sini nga madamo sang nagapabor sa aerial spraying, apang madamo man sang nagapamatok.
Ginpili naman sang Provincial Government nga magfocus sa biological control ukon ang ‘Green Solution’ kun sa diin sila ang naga-cultivate sang fungi kag pag-breed sang insekto nga makabato sa RSSI.
Paathag ni Lacson, nga wala man sang problema sa provincial government kun pondohan sang Department of Agriculture ang aerial spraying ukon iban pa tikang, paagi sa Sugar Regulatory Administration (SRA).
Ang SRA ang magakoordinar na derekta sa mga local government units, kun sa diin sila ang magahatag sang pondo sa pag-away sa RSSI, lakip na diri ang paghatag sang chemical pesticide.
Ang LGU naman ang magapahibalo na lamang sa Provincial Government kun ano ang ila nga tikang.
Panugyan ni Lacson nga kun luyag magpatigayon sang aerial spraying, sarang gid nga makakoordinar sa mga alkalde sang banwa ukon ciudad.
