Ginklaro ni Ombudsman Jesus Crispin Remulla nga wala sila sang may ginapili basta may supisyente nga ebidensya angot sa alegasyon nga ginatarget sang ila talatapan ang bag-o nga Senate minority bloc.
Sa isa ka press briefing kahapon, hugot nga ginpanginwala ni Remulla nga may ginaapinan ang Office of the Ombudsman sa mga ginaimbestigaran nga mga senador.
Suno diri, madamo subong sang mga may ginapangatubang nga kaso nga anay kaalyado nila.
Sa karon, ginatutukan sang Ombudsman ang obstruction of justice complaint nga ginpasaka batok sa mga Senador nga sanday Alan Peter Cayetano kag Robin Padilla, kasubong man sa anay Senate Sergeant-at-Arms nga si Mao Aplasca, may kaangtanan sa pagbiya ni Senator Ronald “Bato” Dela Rosa sa Senado apisar nga may arrest warrant naggikan sa International Criminal Court (ICC).
Samtang, ginpahayag man ni Remulla nga nagapadayon ang case build-up batok kanday Senator Joel Villanueva kag Francis “Chiz” Escudero, nga lunsay kabahin anay sang minority bloc apang katapo na sang Senate majority.
Angot naman sa reklamo nga malversation batok kay Villanueva may kaangtanan sa ginaalegar ghost flood control projects, ginpahayag ni Remulla nga wala nalab-ot sang mga ebidensya nga ginsumiter sang Department of Justice o DOJ ang standard sang Office of the Ombudsman.
