Ginbuyagyag ni anay Department of Public Works and Highways (DPWH) secretary Manuel Bonoan kahapon sang Miyerkules sa Sandiganbayan nga tanan nga senador ang gin-alegar nakabaton sang ginatawag nga “leadership fund” humalin sang 2024.
Suno kay Bonoan, ang nasambit nga fund ang gintalana sang DPWH para sa mga senador nga nagahatag sang listahan sang mga proyekto nga luyag ilakip sa budget.
Ginpahayag sini nga tagsa sa mga senador ang gin-alegar nakabaton sang tig-P500 million nga alokasyon, samtang ang mga senador nga may committee chairmanship ang nakabaton sang tig-P1 billion.
Suno diri, may kabug-usan nga P24 billion ang leadership fund kag yara sa idalom sang discretion ni anay Senate President Sen. Juan Miguel Zubiri.
Suno pa diri, mahimo mapasakaan pa sang senate president ang alokasyon.
Ginbuyagyag man ni Bonoan nga ginhingyo ni former DPWH undersecretary Roberto Bernardo kanday anay Sen. Bong Revilla kag Sen. Jinggoy Estrada nga magsumiter sang listahan sang ila mga proyekto.
Dugang pa sang former DPWH chief, nagsumiter man sang listahan sang proyekto sanday Sen. Bong Go kag Robin Padilla.
Gin-ako man ni Bonoan nga nagpasalamat sa iya sanday Padilla kag Senator Imee Marcos para sa iya nga ginatawag “assistance.”
