Nangin madinalag-on ang ginpatigayon nga Rescue March may kaangtanan sa National Disaster Resilience Month sa ciudad sang Bacolod.
Sa interview sang Bombo Radyo Bacolod kay Bacolod City Secretary to the Mayor Atty Marty Go, ang aktibidad ang ginpangunahan sang City Disaster Risk Reduction and Management Office, nga gin-updan man sang nagkalainlain nga volunteer rescue group, Philippine National Police, Bureau of Fire Protection, Barangay Rescue Units, bisan ang mga kaiping nga local government units kaangay sang Murcia, Talisay City kag Bago City.
Indi kaangay sa regular nga rescue simulation exercise, ginkonsiderar nila ang sitwasyon nga may kabudlayan sa mobility kaangay na lamang sa tion sang mga linog nga guba ang mga dalanon, kag kinanglan sang mga rescue units nga maglakat lamang sa pagresponder.
Ang aktibidad ang nag-umpisa sa Bacolod City Public Plaza, nagsaylo sa San Juan Fire Station, malapit sa Negros Occidental Provincial Capitol Lagoon, City Health Office, Upper East Megaworld, kag Bacolod City Government Center.
Suno kay Go, sa kada area, may-ara sang lainlain nga scenario nga ginarespondihan.
Kalakip diri ang pagresponder sa sunog, insidente nga madamo sang casualties, extraction sang mga biktima gikan sa mga nacollapse nga building, exposure sa hazardous areas, kag iban pa.
Sa simex, ginatest ang level sang endurance sang mga rescuers, kasubong man ang coordination kag communications sa tion sang kaangay nga mga rescue efforts.
Ginapakamaayo naman ni Go nga kumpleto man sa rescue equipments bisan ang mga volunteer rescue groups, kag fully trained man ang mga personnel.
Wala naman sang nangin problema sa trapiko bangod makadali lamang ang aktibidad kag dyutay man ang mga motorista bangod Sabado.
