Gindala na sa Provincial Veterinary Office ang ido nga ginmaltratar sang isa ka content creator kag iban pa nga mga ido nga iya ginapanag-iyahan.
Sa interview sang Bombo Radyo Bacolod kay Fulgen Fedeles Balinas, Municipal Information Officer sang banwa sang Cauayan, ginpahayag sini nga ginpatawag sang lokal nga panguluhan sang nasambit nga banwa ang ginreklamo nga lalaki nga nagsakit sang iya ido agud mag-atubang kay Mayor John Rey Tabujara.
Sunod sini, ginpaidalom man ang lalaki sa isa ka special guidance counseling kag ginpahibalo sa iya ang kabug-aton sang iya ginbuhat.
Matapos ang counseling, nagkoordinar ang mga staff sang Cauayan LGU sa BACH Project, isa sa mga tagreklamo kag organisasyon para sa animal welfare, kag sa Provincial Veterinary Office agud matalakay ang kahimtangan sang mga sapat.
Suno kay Balinas, nagpakig-angot man sila sa Barangay Bugsay kun diin naga-istar ang lalaki, agud magpangayo sang bulig para sa pagdulhog sang mga ido sa barangay hall.
Duha ka ido ang gindala sa lugar, lakip na ang ido nga ginsakit.
Nag-abot man ang mga tiglawas sang BACH Project kag sang Provincial Veterinary Office.
Suno diri, ginpapirma ang tag-iya sang kasugtanan nga nagapahanugot nga i-surrender ang mga ido.
Pagkatapos sang proseso, gindala ang mga ido sa Provincial Veterinary Office agud mahatagan sang veterinary examination kag masiguro ang ila ikaayong lawas.
Nagpahanumdom naman ang animal welfare group nga BACH Project sa mga content creators nga wala sang problema sa paggamit sang pets sa content, apang indi dapat sakiton ang mga sapat.
Ini kasunod sa issue sang vlogger sa banwa sang Cauayan nga naglapta sa social media matapos sini gintampuyong sang mabaskog ang iya aspin, nga nagtabog gid kag nagpiyangak bangod sa makusog nga impact.
Sa interview sang Bombo Radyo Bacolod kay Christopher John Bertol, manager sang BACH Project PH, wala pa sila makadesisyon kun magapasaka sang kaso batok sa 18 anyos nga high school dropout, tag-iya sang Jomond JTV nga facebook account, nga residente sa Brgy Mambugsay, Cauayan.
Apang paagi sa pagkoordinar sa Negros Occidental Provincial Veterinary Office, nahimo nila nga marecover ang duha ka aspin sang vlogger.
Ang ido nga gindapal ni Jomond JTV ang ginkilala nga si “PRINCESS” samtang ang manghod sini amo si “SARA.”
Suno kay Bertol, nagkoordinar pa sila sa Negros Occidental Police Provincial Office sa pagrescue sang ido bangod nahibaluan nga nagapuyo sa nabukid nga bahin sang banwa si Jomond JTV, apang ini ang una na nga ginrecover sang local government unit.
Gani sila ang sa Barangay na lamang nagkoordinar, kun sa diin nagpirma sang kasugtanan ang vlogger sa pagsurrender sang mga ido.
May-ara naman sang nagpalab-ot sang tinutuyo nga luyag adoptaron sanday Princess Sara, apang ini ang wala pa nila ginbatun, bangod luyan anay nila nga maseguro nga mapaidalom sa nagakaigo nga medical checkup ang mga kasapatan.
