Nagfile sang kaso nga reckless imprudence resulting to homicide ang ginikanan sang apat ka tuig nga bata nga aksidente nga nalapakan sang Ceres Bus sa National Highway sa Sitio Sta. Ana Reles, Brgy. Mabini, Escalante City, ala-1:30 kahapon sang hapon.
Sa interview sang Bombo Radyo Bacolod kay Police Lt Col Florendo Fajardo, hepe sang Escalante City Police Station, nagpadulong na ang ginikanan sa piskalya kaina sang aga, para sa inquest proceedings.
Nahibaluan nga gikan sa Manila ang pamilya, apang sa pag-abot nila sa lugar ang iloy amo ang una nga nagpanaog sang pila ka bagahe.
Ginhakwat naman sang konduktor ang apat ka tuig nga bata nga lalaki kag ginbutang sa kilid sang dalan, samtang ang amay ang naulihi.
Apang wala natalupangdan nga ang bata ang naglakat sa atubang sa bahin sang natuo nga royda.
Sang napapanaog na ang tanan nga bagahi, naglarga na ang Ceres bus kag wala natalupangdan sang driver nga yara sa idalom ang bata bangod mataas ang bus.
Ginsinggitan lamang ang driver sang pila ka bystander nga nagpanawagan nga ini ang magpondo bangod nabungguan sini ang bata.
Gindala pa sa ospital ang bata, apang bangod sa severe head injury, siya ang gindeklarar nga dead on arrival.
Ang driver ang yara na sa karun sa kustodiya sang kapulisan, samtang mahimo nga indi naman maulamid sa kaso ang konduktor.
