Nagapabilin nga determinado ang gobyerno nga masiguro ang una nga suplay sang kuryente naggikan sa nuclear power plant sa tuig 2035, apisar gin-isol ang una nga target nga 2032 samtang ginahulat ang pagkumpleto sang mga kinahanglan nga regulatory kag safety approvals.
Suno kay Department of Energy (DOE) Energy Utilization and Management Bureau Director Patrick Aquino, ginalauman nga maga-umpisa ang aktwal nga pagpasulod sang kuryente sa power grid naggikan sa mga nuclear power plant sa tunga-tunga sang 2035 kag 2038, kun wala sang pagbag-o sa Philippine Grid kag iban pa nga teknikal nga kinahanglanon.
Sa karon, ginakumpleto sang DOE ang mga guidelines para sa labing-una nga capacity auction sang nuclear power generation sa pungsod.
Madumduman nga sang Setyembre, ginpirmahan ni President Ferdinand Marcos Jr. ang Republic Act No. 12305, ang pagtukod sang Philippine Atomic Energy Regulatory Authority ukon PhilAtom.
Ang bag-o nga ahensiya amo lamang ang may otoridad sa pagpatuman sang regulasyon para sa matawhay kag luwas nga paggamit sang nuclear energy kag radiation sources sa Pilipinas.
Apisar wala pa sang pinal nga implementing rules and regulations para sa nasambit nga layi, ginpasiguro ni Aquino nga padayon ang paghanda sang gobyerno agud masabat ang mga kinahanglan kag masuportahan ang operasyon sang PhilAtom sa palaabuton.
