Nagalapta na sa karun sa Barangay Handumanan ang mga tarpaulin sang mga plano nga magpadalagan sa palaabuton nga eleksyon.
Sa interview sang Bombo Radyo Bacolod kay Barangay Kagawad Rommel Exanes, kalabanan sa mga ini ang aspirants ukon plano pa lamang nga magsulod sa lokal nga politika, samtang halos duha lamang ka incumbent official ang nakita sini nga nagtapik sang tarpaulin.
Agud indi mahalata nga para sa pagpangampanya, wala lamang ginbutangan sang tinaga nga “VOTE” ang mga tarpaulin, apang ini ang ginapalapta na, samtang may-ara man nga nagbutang na sang termino nga KAGAWAD antes sang ila pangalan.
Suno kay Exanes nga sa 61 ka Barangay sa Bacolod City, ang Handumanan lamang ang nakita sini nga tuman gid ka lapnagon ang early campaigning.
Sa kadamuon sang nagalapta nga tarpaulin, ginalantaw sini nga magadangat sa kapin 70 ang magapapili sa Barangay Kagawad sa Brgy Handumanan.
