Nagapangabay ang Negros Occidental Police Provincial Office (NOCPPO) sa publiko nga magreport sa mga makaduluda nga mga hitabo nga posible may kaangtanan sa Online Sexual Abuse and Exploitation of Children ukon OSAEC, agud maproteksyunan ang mga kabataan batok diri.
Sa interview sang Bombo Radyo Bacolod kay Police Major Judesses Catalogo, spokesperson sang NOCPPO, gin-encourage man niya ang mga biktima nga indi magkahadlok kag magreport sang ila eksperyensya sa mga otoridad.
Suno diri, ini ang ginatutukan gid sang Women and Children Protection Desk (WCPD) sa pagpakig-koordinar sa Anti-Cybercrime Unit sang Philippine National Police (PNP) para sa pagmonitor kag pag-imbestigar sang mga kaso nga may kaangtanan sa OSAEC.
Madumduman nga napulo na ka menor de edad ang na-rescue paagi sa coordinated operations sang nagkalain-lain nga ahensya humalin Hunyo tubtob Hulyo sini nga tuig.
Ang mga menor de edad nga na-rescue yara na subong sa protective custody sang mga social workers para sa ila seguridad.
