Nagpanawagan ang Bacolodnon nga tag-iya sang pumpboat nga nabiyaan matapos ma-abreya kag marescue ang anom ka sakay sang Domingo sa baybayon sang Madridejos sa Bantayan Island, Cebu, nga mabalik sa ila ang bangka kun may-ara sang makakita.
Sa interview sang Bombo Radyo Bacolod kay Ariel Romero, tag-iya sang pump boat, gikan sa Cadiz City kag papauli na kuntani ang iya mga tinawo sang nabuslot ang pumpboat pagdangat sa baybayon sang Sagay City.
Kapin 24 oras antes natigayon nga marescue ang anom ka sakay sang bangka alas-3:00 sang kaagahon sang Lunes.
Ang mga ini ang narescue sang Coast Guard Sub-Station Madridejos sa baybayon sang Madridejos.
Bangod prayoridad sang Coast Guard nga marescue ang anom ka sakay, ang mga ini ang ginkuha kag gindala sa ospital para sa clearing, kag sa karun nakapauli na sa ila nga panimalay.
Gintinguhaan man nila nga marecover ang pumpboat apang wala na makit-an.
Gina-alegar sang tag-iya sang pumpboat nga may nagkuha sang sakayan bangud una na nga na-locate kun sa diin ang nahamtangan sini apang pukot nalang ang bilin.
Panawagan niya nga kun may nakakuha ukon nakakita, ini ang mapahibalo kag mauli sa ila bangod ang pumpboat lamang ang gamit sang iya mga tinawo sa ila palangabuhian nga pagpangisda.
Ang Pumpboat ang may color nga white and red kag may pangalan nga “divine mercy.”
