Nakilal-an na ang driver sang mini van nga nag-hit and run sa 32-anyos nga lalaki sa dalan Lacson, Bacolod City sang Agosto 10, 2026.
Madumduman nga nabunggoan si John Michael Pagunsan samtang nagatabok sa dalan sang driver sang van nga ginapahayag yara sa impluwensya sang makahulubog nga ilimnon.
Gilayon nga nagpalagyo ang driver samtang si Pagunsan ang nagapabilin sa gihapon sa ospital para sa padayon nga pagbulong.
Sa interview sang Bombo Radyo kay Police Major Elmer Bonilla, head sang Traffic Enforcement Unit, BCPO, ginpahayag sini nga sang Miyerkules, nadiskubrehan nga gin chop-chop na ang nasambit nga van sa isa ka junk shop sa Victorias City.
Suno kay Bonilla, gin-islan ang pila ka mga parte sang salakyan kag ginpintahan sang itom ang anay duag nga puti.
Ginkakas man ang body number kag indi naman ma-locate ang plate number sang van.
Sa pihak sini, ginpahayag ni Bonilla nga nakilala-an ang driver sa bulig sang mga nakasaksi kun sa diin ginkumpirmar sang mga ini nga ang amo nga van ang nakabunggo sa biktima.
Apang suno kay Bonilla, ang driver ang mahimo nga nakapalagyo na, gani padayon ang imbestigasyon sang mga kapulisan sa pagtsekyar sang mga CCTV footage sa pagdakop sang driver.
Pahayag ni Bonilla nga nakadepende sa gihapon sa pamilya sang biktima kun sila ang magapasaka sang kaso batok sa driver.
