Ginkay-o sang House of Representatives ang schedule sang hearing sa proposed 2027 national budget bangud sa mga aberya tuga sang malain nga paniempo, apang target gihapon nga matapos ang budget deliberations sa orihinal nga timetable.
Suno kay House Appropriations Committee Chair Rep. Mika Suansing, liwat nga magaumpisa ang budget hearings sa Agosto 24, sa diin magaatubang sa komitiba ang pila ka mga ahensya kalakip ang Philippine Amusement and Gaming Corporation, Department of Trade and Industry, Department of Justice, Philippine Charity Sweepstakes Office kag Department of Science and Technology.
Suno kay Suansing, idunganon ang pila ka mga hearing kun kinahanglan agud mabawi ang mga na-delay nga hearing.
Magapadayon ang committee-level budget hearings tubtob sa Setyembre 8.
Ginsiguro naman ni Suansing nga mangin maid-id gihapon ang pag-usisa sa proposed budget apisar nagalaut sa schedule.
Suno pa diri, magahimo man ang komitiba sang supisyente nga allowance sa schedule sa posibilidad sang panibag-o nga delay samtang ginasiguro nga matapos ini sa oras.
