Ginserbehan sang Land Transportation Office-Negros Island Region sang Show Cause Order (SCO) ang tricycle driver nga gina-alegar nagsumbag sa traffic enforcer sa ciudad sang Himamaylan, Negros Occidental.
Sa report sang LTO NIR, ginserbe sa tricycle driver ang SCO sang Agosto 20 sa Barangay 3 People’s Hall sa amo nga ciudad.
Nakilala ang tricycle driver bangud sa nagalapta nga video sa social media nga gina-alegar nagsumbag sa local traffic enforcer kasunod sa nagluntad nga komprontasyon angot sa pag-park sa kilid dalan sang tinalikdan Agosto 19.
Sa interview sang Bombo Radyo Bacolod kay Jeck Conlu, regional director sang Land Transportation Office- Negros Island Region, ginhatagan sang lima ka adlaw ang natungdan nga magsabat sa gindagdag nga SCO.
Suno kay Conlu gindagdagan sang SCO ang driver sang tricycle nga nanumbag sa traffic enforcer bangud makabig ini nga “improper person to operate a motor vehicle”.
Suno diri, kun ang isa ka driver ang indi makahibalo magrespeto sa mga law enforcers sa dalan tuman ini ka delikado.
Panugyan sini sa tanan nga mga nagamaneho sang salakyan nga dapat magrespeto sa law enforcers kag mga kaangay nga driver sa dalanon agud malikawan ang kun ano man nga disgrasya sa dalanon.
