Indi upang para sa Bacolod City Police Office ang kakulang sang manpower agud nga mapatigayon sang husto ang expanded Oplan Bulabog.
Sa interview sang Bombo Radyo kay Police Lt. Col. Albart Tare, deputy city director for operations sang Bacolod City Police Office, mabudlay lab-uton ang one police officer is to 500 population ratio (1:500) apang wala nila ini ginakabig nga upang para sa operasyon.
Suno kay Tare, nagpadala sang duha ka personnel ang kada police station sa Police Station 8 nga amo ang host station sang Agusto 20 sang gab-i.
May mga force multiplier man nga nag-upod sa mga pulis.
Kampante si Tare nga naplanuhan sang maayo ang operasyon bangud ginsiguro ini sang BCPO kag sang station commander nga si Police Major Rondyl Tapang nga anay miyembro sang Special Action Force.
Suno sa deputy city director for operations, indi gid man maperfect ang operasyon apang may mga emergency responders nga handa gilayon nga magbulong kun may mapilasan.
Mandatory man para sa ila ang pagsuksok sang reflectorized vest kun gab-i kag pagdala sang pito kag flashlight.
Maayo man ang feedback sang mga pumuluyo sa operasyon kun sa diin hungod nga ginasulod ang mga lugar nga kilala sa illegal drugs.
Nalipay man si Tare nga nakahibalo na ang mga pumuluyo sa SAFE NIR DIAL 911 PROGRAM bangud nakaagi na sila tawag diri.
Kadungan sini, nagpahanumdom siya sa mga pumuluyo nga magtawag sa 911 kun nagakinahanglan sang bulig apang likawan ang hoax ukon prank calls.
