Liwat nga nanawagan ang Bacolod City Health Office sang pagbulig sang tanan sa pagtapna sang dengue.
Ini kasunod sang pagsaka na sa lima sang mga napatay bangod sa dengue, matapos madugangan sang duha ka kabataan nga siyam kag walo ka tuig nga lalaki.
Ang siyam ka tuig nga bata gikan sa Brgy Mansilingan ang ginapahayag nga umpisa nga ginhilanat sang Agosto 28, apang ini ang ginpainom lamang sang paracetamol.
Tubtob nga nagbalik-balik lamang ang hilanat, kag ila nga ginpakonsulta sang Setyembre 1, kun sa diin ini ang nadiagnose nga may severe dengue.
Ang bata ang napatay sa ospital kasunod nga adlaw, Setyembre 2.
Samtang ang walo ka tuig nga bata gikan sa Brgy 16, ang umpisa naman nga ginhilanat sang Setyembre 1.
Apang ini ang na-admit sang Setyembre 7, kag ginbawian sang kabuhi kasunod man nga adlaw, Setyembre 8.
Halin Enero tubtob Setyembre 12, nagsaka na sa 666 ang narecord nga dengue cases sa Bacolod City.
Sa interview sang Bombo Radyo Bacolod kay Dr. Grace Tan, head sang Environment and Sanitation Division sang Bacolod City Health Office, indi dapat magsalig sa ginapatigayon nga clean-up operations sang mga health workers.
Panindugan ni niya nga ang away sa dengue ang dapat naga-umpisa sa household-level.
Ini bangod kutob lamang sa gwa ang malab-ot sa clean-up drive sang mga health workers kag barangay officials, kag indi na makita ang mga stagnant waters nga yara sa ugsaran kag sulod sang panimalay.
Pahanumdom nila ang pagsunod sa 4T ukon ang taob, taktak, tuyo, kag takip.
Kun sa diin dapat pangitaon ang mga stagnant waters nga mahimo pangitlugan sang lamok, mapakulob, mataktak, mapamala, kag matakluban, agud indi na magdamo ang mga lamok nga mahimo makadala sang dengue.
Pahanumdom ni Tan nga ini ang indi masarangan sa effort lamang sang gobyerno, kundi kinahanglan ang partisipasyon sang tanan.
