Nagpagwa sang hibubun-ot si Senator-judge Robin Padilla samtang ginapaathag ang sitwasyon sang mga kaupdanan sini nga Senador gikan sa Minority nga sa karun indi makatambong sa impeachment trial ni Vice President Sara Duterte.
Paathag ni Padilla nga ginmensyonar nila ang mga Senador nga napriso agud maklaro sa publiko ang gina-agyan sang minorya kag agud indi pakanubuon ang ila kaupdanan.
Panindugan niya nga indi dapat tratuhon ang mga Senador nga kaangay nga napamatbatan na, bangod wala pa sang final conviction batok sa mga ini.
Ginhingyo man ni Padilla nga kuntani mahatagan sang kahigayunan ang mga napriso nga Senador nga makatambong sa impeachment proceedings, paagi sa pagpakig-angot sa Sandiganbayan.
Suno diri, magkaupod sila nga nanumpa bilang mga Senador gani dapat may-ara man sang paghangop sa sitwasyon sang kada isa.
Sa pagtakop sang iya pahayag, nangin emosyonal si Padilla samtang ginamensyonar ang posibilidad nga mahimo nga siya ang indi na makabalik sa Senado, bangod sa Biyernes na ang iya nga hearing.
Ginsundan niya ini sang mensahe sa iya mga kaupdanan nga “Baka ma-miss ko na kayo.”
