Nakilal-an na ang lalaki nga nga nasapwan patay sa katubuhan sa Barangay 12, Victorias City kahapon sang aga, Oktubre 6.
Ang bangkay ang ginkilala nga si Jomar Delos Santos Santillan, 35-anyos, lalaki, kag residente sang Purok Bolinao, Barangay 1, ciudad sang Bacolod.
Sa interview sang Bombo Radyo Bacolod kay Punong Barangay Cesar Rellos, ang bangkay ang positibo nga ginkumpirmar sang iya manghod bangud sa tattoo sini sa kamot.
Suno sa manghod sini, ulihi nga ginhambal sang iya nga magulang nga ini ang makadto sa ciudad sang Silay.
Suno kay Rellos, wala na ini nagapauli sa Barangay bangud madamo ini sang atraso kag record.
Samtang, nagapadayon sa karun ang imbestigasyon sang mga kapulisan sa nasapwan nga bangkay sang lalaki.
Sa interview sang Bombo Radyo Bacolod kay PLT Enrique Casila, Deputy sang Victorias City Police Station, ginaimbestigaran na sang mga kapulisan ang insidente agud nga matumod kun sin-o ang nagpatay diri kasubong man ang motibo sa krimen.
Suno kay Casila, ginatumod man sang mga kapulisan sa karun ang gintunaan kag pila ka bilog ang pilas sang biktima nga nangin rason sang kamatayon sini.
