Ginkalipay sang pila ka mga senador sang Senate Majority Bloc ang pagsaylo ni Senator Mark Villar halin sa minorya padulong sa mayorya.
Ini ang ginkumpirmar ni Senate Majority Leader Migz Zubiri kahapon.
Bangud sini, may kabug-usan nga 14 ka miyembro na sang mga senador ang minority bloc samtang 10 ka miyembro na lamang ang nabilin sa minority bloc nga ginpamunuan ni Sen. Alan Peter Cayetano.
Kalakip na diri sanday Senator Loren Legarda nga naka-medical leave, Jinggoy Estrada kag Rodante Marcoleta nga lunsay naka-detain kag Ronald Dela Rosa nga nagapanago.
Suno kay Senate President Pro Tempore Tito Sotto, madamo sila sang trabaho kag makabulig ang pagdugang ni Villar sa ila nga grupo.
Ginkumpirmar man niya nga si Zubiri ang nag-engganyo kay Villar nga magsaylo sa Majority bloc.
Samtang, ginpanindugan naman ni Zubiri nga wala sang kaangtanan sa impeachment trial ang pagsaylo ni Villar.
Suno kay Zubiri, madugay na nga kabahin sang majority si Villar kag temporaryo lamang ini nga yara sa minority.
Ginpahayag sang senador nga na-istorya nila si Villar kag luyag sini nga makabalik sa majority para mas makatrabaho sa mga komitiba kag mangin mas aktibo sa paghimo sang mga layi.
Ginkalipay naman ni Senator Raffy Tulfo ang pagsaylo ni Villar sa mayorya.
Suno kay Tulfo, ginatugyan ni Sotto III ang iya nga committee chairmanship para kay Villar, kag ginhatag naman ni Zubiri kay Villar ang iya nga pwesto sa Commission on Appointments.
Ginpahayag man ni Tulfo nga may mga huring-huring nahanungod sa posible nga pagdugang pa sang mga senador sa Majority bloc.
Sa pihak nga bahin, ginpahayag ni Senator Christoper “Bong” Go nga wala na siya nakibot sa pagsaylo ni Senator Mark Villar sa majority bloc.
Suno kay Go, natural na ini nga nagakatabo sa ila nga mga senador kag ginarespeto niya ang desisyon sang isa kag isa.
Samtang, nagpalab-ot sang mensahe si Senate Minority Leader Alan Peter Cayetano kay Villar kasunod sa pagsaylo sini sa Majority bloc.
Sa iya nga statement, ginpahayag ni Cayetano nga padayon siya nga nagapangamuyo para sa pungsod kasubong man sa ikamaayo ni Villar kag sa tanan nila nga kaupdanan sa Senado.
