Nagapadayon ang ash emission activity sa Bulkan Kanlaon kasunod sa nagluntad nga moderately explosive eruption sang Oktubre 10.
Sa interview sang Bombo Radyo kay Philippine Institute of Volcanology and Seismology (PHIVOLCS) Director Teresito Bacolcol, napulo ka mga ash emission activities ang narecord sa Bulkan sa subong nga Oktubre 12.
Suno kay Bacolcol, may 13 naman ka mga volcanic earthquakes kalakip na ang anum ka volcanic tremors ang narecord sa sulod sang 24 ka oras.
Samtang, alas-5:45 kaina sang aga ang pinaka-ulihi nga pagbuga sang abo sang Bulkan Kanlaon.
Ang plume ang may kataason nga 300 meters nga nagpadulong sa nortwest direction.
Suno kay Bacolcol, ang padayon nga pagbuga sang abo sang Bulkan ang mahimo makaapekto sa ikaayung lawas sa tawo ilabi na sa mga may hapo ukon respiratory disease.
Gani ginpanugyan sini sa publiko nga sirad-an ang mga pwertahan kag bintana sa balay agud indi makasulod ang abo.
Magsusok sang facemask kun maggwa sa balay ukon tela nga basa nga mahimo itabon sa bibig agud malikawan nga mahaklo ang abo ukon ang baho sang asupre.
Mensahe ni Bacolcol nga magsunod sa mga panugyan sang Local Government Unit kag sa DRRMO.
Panugyan naman sini sa mga pumuluyo nga yara sa 4km permanent danger zone nga gilayon mag-evacuate kun ipasak sa Alert level 3 ang bulkan.
Sa karun, nagapabilin ini sa Alert level 2.
