Isa ka bangkay nga nakasulod sa sako kag wala na sang pang-idalom nga panapton, ang nasapwan sa Sta. Catalina, Barangay Dos Hermanas, ciudad sang Talisay, Negros Occidental, kagab-i, Oktubre 13.
Ang biktima ang ginkilala nga si Jenalyn Ansalay, 33-anyos, residente sa Mindanao, kag naga-trabaho sa isa ka manokan kun diin natabo ang krimen.
Sa interview sang Bombo Radyo Bacolod kay Police Lieutenant John Patrick Linda, Deputy Chief of Police for Administration sang Talisay City Police Station, ginpahayag nga may nabaton sila nga report nga may nasapwan nga bangkay sa nasambit nga lugar.
Gilayon nga ginkadtuan sang mga kapulisan ang area kag ginkumpirmar nga ini ang bangkay sang tawo.
Suno diri, temporaryo nga napahamtang sa Talisay City Police Station ang duha ka persons of interest nga nag-ako sa krimen apang kuhaan pa sang statement ang mga ini kag kinahanglan pa sang imbestigasyon kasubong sang mga statement sang mga testigo kag mga ebidensya agud makumpirmar nga sila gid ang may kahimuan sang krimen.
Base sa panaysayon sang bana sang biktima nga si Jofer Gregorio, wala gid siya sang ihibalo kun diin nagkadto ang iya nga asawa sang ini ang ulihi nga nakita sang Huwebes, Oktubre 8.
WATCH: https://www.facebook.com/share/v/19ZRLxgbX2/
Nagpati ini nga nag-upod na sa iban nga lalaki ang iya nga asawa.
Sila ang may duha ka kabataan naga-edad siyam ka tuig kag pito ka tuig.
Suno kay Gregorio, gilayon nga nakilal-an ang iya asawa sang nakita ang bangkay sini.
Ginpahayag nga kilala sini ang mga suspek kag kaupod ubra sa kampo bilang tapasero.
Desidido si Gregorio nga pasakaan sang kaso ang mga suspek.
