Patay ang apat ka mga personnel sang Philippine Air Force (PAF) matapos nga nagbunggu-anay ang duha ka military training aircraft sa kahanginan samtang nagapatigayon sang formation flight sa Fernando Air Base sa Batangas.
Kalakip sa mga involved sa insidente amo ang duha ka SF-260 training aircraft nga may tail numbers 032 kag 037.
Base sa report sang militar, nagbunggu-anay ang duha ka eroplano samtang yara sa kahanginan antes nag-crash.
Ginkilala ang mga biktima nga duha ka first lieutenant, isa ka captain kag isa ka major.
Samtang, luwas naman nga nakabalik ang lima pa ka mga eroplano kag naghugpa sa air base nga nagapasakop sa amo man nga formation training flight.
Suno kay PAF Spokesperson Col. Alvin Jay Capinguian, gilayon nga ginlunsyar ang mga emergency response protocols agud masiguro ang seguridad sa crash site kag maimbestigahan ang insidente.
Samtang ginakasubo sang Philippine Air Force (PAF) ang kamatayon sang apat ka mga pilot nga involved sa aviation accident sa ila training flight sa Fernando Air Base sa Batangas sang Biyernes.
Ginapatigayon na ang imbestigasyon agud matumod ang rason sang aksidente.
Nagpasalig naman ang PAF sang bulig sa pamilya sang biktima.
Sakay sang duha ka mga eroplano ang duha ka 1st lieutenant, isa ka kapitan kag isa ka major.
