Proud and honored ang ciudad sang Sagay nga nakabaton sila sang tatlo ka dalagko nga awards sa component city category sang 2026 Association of Tourism Officers of the Philippines (ATOP) Pearl Awards sang Oktubre 21.
Ang ini nga mga awards ang ginhatag kadungan sang 27th ATOP National Convention and Pearl Awards nga ginpatigayon sa Ormoc City halin October 20- 22.
Ang Sagay City ang Grand Winner for Best Practices in Community-Based Tourism para sa entry nga “A Maze of Wonders, A Lifeline for All: The Lapus-Lapus Community-Based Tourism Story.”
Ang duha ka iban pa nga awards ang ginalakipan sang Grand Winner for Best Tourism Souvenir – Non-Food Category for “From Waste to Wear: Bilidhon Upcycled Accessories,” kag Grand Winner for Best Tourism Promotions: Brochure.
Sa interview sang Bombo Radyo kay Sagay City Tourism Officer Helen Arguelles-Cutillar, honored sila sa sini nga mga pasidungog bangud madamo sang mga entries kag hugot ang criteria kag screening.
Suno kay Cutillar, nagapati sila nga masarangan sang pumuluyo ang sustainable livelihood kun i-empower sila sang local government unit gani ini ang ginatutukan sang Sagay City Government.
Suno sa iya, damuon pa gid nila ang mga lugar sa Sagay nga may eco-tourism para sa tour loop sang mga turista bangud proteksyunan ini sang mga pumuluyo samtang sila ang naga-income.
Nagalaom man ini nga buligan sang mga turista ang community-based eco-tourism sites sa Sagay City agud nga padayon nga ma-sustain sang development para sa masunod nga henerasyon
Suno naman kay Joefel Relos, presidente sang Lapus-Lapus Floating Cottage, nagsugod ang ila pangabuhian sang pandemic kun sa diin may limitasyon sa hulag sang mga pumuluyo gani nagfocus sila sa ila nga komunidad.
Nagpasalamat sila nga ginbuligan sila sang city government agud nga mangin legal ang ila palangabuhian halin 2022 asta subong.
Bangud sa mga training nga ginahatag sang city government, nakahibalo na sila kun paano i-manage ang lugar nga ila palangabuhian.
