Ginkumpirmar sang regional director sang Department of Agriculture Negros Island Region nga naghingyo si Negros Occidental Governor Eugenio Jose Lacson sang liwat nga pagpatigayon sang cloudseeding operations sa probinsiya sang Negros Occidental bangud sang ginapaabot nga Super El Niño.
Suno kay Director Engr. Jose Albert Barrogo nga ang dugang nga cloud-seeding operations ang gin-request sang gobernador.
Suno kay Barrogo, magakinahanglan sang P30 million agud masustenir ang cloud-seeding operations tubtob sa bulan sang Abril.
Nagapangita na ang Bureau of Soils and Water Management (BSWM) sang sarang makuhaan sang pondo samtang si Sugar Regulatory Administration (SRA) Administrator Paul Azcona ang nagpabutyag nga may available sila nga pondo apang lantawon pa kun sarang pa sila nga makapatigayon sang procurement.
Target nga makapatigayon sang cloud-seeding operations sa bulan sang Disyembre bangud ini ang critical period para sa mga pananom nga humay kag high value crops.
