Ginpaidalom na sa inquest filing ang patong-patong nga kaso nga ginpasaka batok sa tatlo ka mga suspetsado nga sakay sa pribado nga salakyan nga nagtiro-patay sa 44 anyos nga lalaki nga nagasakay sa motorsiklo sa Barangay Baliwagan, banwa sang San Enrique sang Lunes sang hapon, Oktubre 26.
Ginkilala ang biktima nga si alyas Elmor, legal ang edad nga residente sang nasambit nga lugar.
Ang kaso nga ginpasaka sa mga suspetsado amo ang paglapas sa Republic Act No. 10591 (Comprehensive Firearms and Ammunition Regulation Act); RA 9165 ukon Comprehensive Dangerous Drugs Act of 2002 kag murder.
Madumduman nga matapos ang krimen, ginpahibalo ang San Enrique Municipal Police Station kag gilayon nga nagpatigayon sa hot pursuit operation ang mga otoridad kag nagrequest san dragnet operation sa malapit nga mga police stations.
Na-intercept sang mga kapulisan ang mga suspect sa Purok Crossing La Carlota, Barangay Don Jorge, Bago City.
Nakita sang mga kapulisan nga may igo sang bala ang windshield sang salakyan sang mga supect.
Narecover ang isa ka KG9 9mm, isa ka norinco 9mm, kag mga bala sa sulod sang salakyan kasubong man ang illegal nga druga ukon suspected shabu.
