Kampante ang Department of Agriculture (DA) nga mabatyagan na sang mga konsumidor ang mas manubo nga presyo sang mga karne sa local market, sa Nobiyembre ukon Disyembre.
Ini ang kasunod sang pag-apruba ni President Ferdinand Marcos Jr. sa pagdugang sang bulto sang mais nga iga-import sang pungsod.
Madumduman nga ginpasaka sa 500,000 metric tons gikan sa 220,000 metric tons ang Minimum Access Volume para sa importasyon sang mais.
Suno kay Agriculture Spokesperson, Assistant Secretary Arnel De Mesa, dako ang mabulig sang pagdugang sang bulto sang mais nga i-import agud masabat ang problema sa livestock industry sa diin mataas ang presyo sang feeds ukon pagkaon sang mga kasapatan.
Suno diri, sigurado nga mapanubo ang gastos sa pagkaon sang mga kasapatan kag malikawan ang pagsaka sang presyo sang karne, kun magdamo ang stock ukon suplay sang mais nga mayor nga ingredient sa paghimo sang animal feeds.
