Mas pabaskugon pa sang Philippine National Police (PNP) ang ila nga manhunt operation para kay Senator Ronald “Bato” dela Rosa kasunod sang expiration sang deadline para sa iya boluntaryo nga pag-surrender.
Suno kay PNP Deputy Chief for Administration Police Lieutenant General Wilson Lopez, supervisor sang manhunt para kay Dela Rosa, nagapabilin nga yara sa Pilipinas ang senador, base sa update sang Bureau of Immigration (BI).
Suno kay Lopez, gin-reorganisa sang kapulisan ang ila tracker teams kag nagtukod sang dedicated task groups sa national kag regional levels agud pangitaon si dela Rosa.
Una na nga naghatag sang ultimatum ang Department of the Interior and Local Government (DILG) para sa senador kag ginhingyo nga magsungka sa sulod sang isa ka semana.
Una na nga gin-anunsyo ni Interior and Local Government Secretary Jonvic Remulla ang P50-million nga padya sa makahatag sang impormasyon para sa pag-aresto kay Dela Rosa.
Suno kay Lopez, madamo na sang tawag ang nabaton sang PNP paagi sa mga hotline nga ginbuksan para sa publiko agud maghatag sang impormasyon sa nahamtangan ni Dela Rosa apang tanan nga impormasyon nga nabaton ang ginapaidalom pa sa validation.
Suno sa opisyal, ginakonsiderar sang mga otoridad ang posible nga agyan ni dela Rosa sa pagpalagyo lakip na ang backdoor exits bilang kabahin sang ila operasyon.
Nagpahayag naman sang paglaum si Lopez nga indi pagtugutan ni dela Rosa nga may masamaran nga pulis sa manhunt operation bangud anay hepe sang PNP ang senador.
Ang senador ang gina-akusaran nga co-perpetrator sa gin-alegar mga krimen nga ginhimo sa war on drugs ni Duterte.
