Sa pag-obserbar sang All Souls kag All Saints Day naghatag sang pahanumdom ang Obispo sang Diocese of Bacolod.
Sa mensahe ni Most Reverend Louie P. Galbines, D, D ginpahanumdom sini nga ang kabuhi sang tawo ang may yara sang ginusuguran kag may katapusan.
Suno kay Galbines ang mga tawo nga natapos na ang kabuhi sa kalibutan ang nakaeksperyensya sang grasya sang Ginoo kag nangabuhi sa kamatuoran, kalipay kag grasya sang Dios kun sa diin nalab-ot na sang mga ini ang ginatawag nga holiness.
Suno diri ang mga tawo dapat nga handumon ang Ginoo kag ang pagkabalaan.
Sa Katekismo ilabi na sa Catechism of the Catholic Church (CCC) 959, nakasaad nga may halintang ang kabuhi upod kay Christo.
Ang una, halintang sang Church militants ukon ang tanan nga mga tawo nga nagakabuhi kag nagatinguha nga malayo sa sala, ukon indi magpakasala kag mapahilayo sa mga temptasyon ni Satanas sa kalibuhi; Ang ikaduha nga halintang amo ang Church suffering or Church Penitent ukon ang mga kilala ukon himata natun sang mga buhi kun sa diin ang mga kalag ang wala pagid natinluan sa grasya sang Ginoo gani sa November 2 sila ang ginadumdom sa pagpangamuyo kag pagpamisa agud nga matinluan ang ila nga kalag sa grasya sang Ginoo agud sa ulihi maatubang man nila ini sang face to face samtang ang katapusan nga halintang amo ang Church Triumpant ukon ang mga Santos nagid nga nagaserbe nga modelo sang mga tawo nga magpabuhi kag sila ang nakalab-ot na kay Cristo paagi man sa kaluoy sini.
Suno sa Obispo, sa November 1 kag 2, nagapahanumdom ini kag nagapasalamat sa Diyos nga nakasugata kita sang mga tawo nga mga maalwan, maayo kag wala sang iban nga personal nga interests kun pakamaayuhon lang ang tanan.
Dugang pa sini nga si San Pablo naghambal nga wala sang tawo nga nagakabuhi sa kaugalingon ukon nagakapatay sa kaugalingon lamang bangud buhi man ukon patay, ginapanag-iyahan ni kita ni Jesu Kristo.
