Sa homiliya ni Most Reverend Louie P. Galbines, DD, Obisbo sang Diocese of Bacolod sa pag-obserbar sang All Saints’ Day sa San Sebastian Cathedral kaina sang aga, ginpahanumdom sini nga luyag sang Dios nga ang tanan nga tumuluo ang mangin santos kag mag-upod sa iya sa ulihi.
Suno kay Galbines, ang tanan nga santos ang malipayon apisar sa tunga sang kabudlayan bangud ang Dios ang yara sa ila tagipusoon.
Pahayag sang Obispo, “holiness is being close to God, wherever we are and whatever we are.”
Suno diri, isa sa mga kabangdanan sa pagkadula sang kalipay sang isa ka tawo kag pagbugnaw sang tagipusoon amo ang pagpalayo sa Dios.
Apang kun yara ang Dios sa kabuhi sang isa ka tawo, wala sang lugar ang kasubo, kag ikaw ang mangin malipayon.
Gani gina-agda sang Obispo nga magpangamuyo agud mapukaw ang pagpati sa Ginoo kaangay sang mga Santos nga ginalantaw gid nila ang presensya sang Dios.
Suno kay Galbines, kabubut-on sang Dios nga ang kada isa sa aton ang mangin santos, bangud kita tanan ang gintalana para mag-upod sa iya sa ginharian.
