Ginalantaw nga maganubo sang 50 porsyento ang magapadulong sa sementeryo sa ciudad sang Bacolod subong nga adlaw Nobyembre 2 (All Souls’ Day) kasunod sang bulk sang mga nagdu-aw sa ila minatay kahapon Nobyembre 1 (All Saints’ Day).
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, indi kaangay sa Diocese of Kabankalan kag Diocese of San Carlos nga kalabanan sang mga pumuluyo ang nagapadulong sa sementeryo sa Nobyembre 2, sa Bacolod City kahapon pa lamang nagdagsa na ang mga ini sa patyo.
Dugang pa nga Oktubre 31 pa lamang may mga una na nga nagbisita sa ila minatay.
Gani nagapati si Bonilla, nga katunga na lamang ang kadamuon sang mga magabisita sa patyo subong nga adlaw.
Sa pihak nga bahin, ginapakamaayo man niya nga nangin matawhay kag malinong ang una nga adlaw sang pag-obserbar sang tigkalalag.
Bangod holiday kag ang kalabanan nga nagabyahe ang padulong lamang sa sementeryo, gani mahapos man nga namanage ang trapiko.
Samtang pipila ka dalanon lamang ang nakaeksperyensya sang pagbug-at sang trapiko, partikular na sa Burgos Public Cemetery kag Rolling Hills Memorial Park.
Sa pagbuhin sang mga magabisita sa patyo, nagalaum si Bonilla nga magpatigayon na sang half-road closure ang Bacoldo Transportation and Traffic Management Department (BTTMD) sa Burgos Street, agud nga mas mapamag-an ang dalagan sang trapiko.
