Nagpatigayon ang provincial government sang Negros Occidental sang Santos nga Misa kadungan sang isa ka tuig nga pagdumdom sang pagwaswas sang Bagyong Tino sang tinalikdan nga tuig.
Ang Santos nga Misa ang ginpatigayon sa Social Hall sang Provincial Capitol Building kun sa diin gintambungan sang mga opisyales kag empleyado sang probinsya.
Sa mensahe ni Negros Occidental Governor Eugenio Jose “Bong” Lacson, ginpatigayon ang misa sa pagpasalamat sa mga naka-survive sa halit sang nasambit nga bagyo kag pagpangamuyo sa mga nagkalamatay kag sa mga wala pa nakita tubtob sa karun.
Suno kay Lacson, ang mga nagtaliwan bangud sa bagyo ang yara na sa maayo nga kahimtangan kag indi na sang mga ini maeksperyensyahan ang mga bagyo nga magawaswas sa probinsya.
Sang mga tinalikdan nga tinuig may bagyo man kag madamol man ang pag-ulan apang wala man nagluntad ang flash floods kag landslides.
Suno sa gobernador ang nasambit nga bagyo ang una nga nagtuga sang tuman nga kahalitan sa sulod sang pila na katuig.
Madumduman ang Bagyo Tino man ang pinakauna nga bagyo ang nagtuga sang dako nga kahalitan sa Canlaon City, Negros Oriental, Bago City kag La Castellana Negros Occidental.
Nahibaluan nga bangud sa Bagyo Tino nagdangat sa 106 ang nagkalamatay kag masobra sa 30 pa ang padayon nga ginapangita tubtob sa karun.
