Nakadepende sa reporting sang local government units ang mabatun nga financial aid gikan sa disaster rehabilitation and reconstruction assistance program funds sang Malacañang.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, sa pagpadala sa ila sang imbetasyon para sa pagbatun sang certification, nakabutang nga indi pwede magpadala sang representatives gani ini ang naglakat kahapon kag wala nakatambong sa komemorasyon sang 128th Al Cinco de Noviembre.
Madumduman nga nagbatun sang P665 million ang Negros Occidental Provincial Government para sa mga LGUs nga nahalitan sang Bagyo Tino kag Bulkan Kanlaon eruption.
Ang pinakadako nga nabatun amo ang La Carlota City, Binalbagan, La Castellana, Moises Padilla, kag Bago City nga magabatun sang tig-P100 million.
P90 million naman sa Sagay City, P40 million sa Isabela, P20 million sa Cadiz City, kag tig-P5 million sa Himamaylan City, Salvador Benedicto, kag Murcia.
Suno sa gobernador, isa sa gin-emphasize ni President Ferdinand “Bongbong” Marcos Jr sa iya speech ang pag-imprubar sang reporting sa Disaster Risk Reduction and Management Councils kasubong man sa Office of the Civil Defense.
Suno kay Lacson, nakadepende sa kun ano ang ginreport nga damages sang mga LGUs ang ginhatag nga bulig pinansyal.
Gin-indicate man suno diri kun para sa diin gamiton ang bulig pinansyal kaangay sang pagkay-o sang naguba nga resettlement area, public infrastructures kaangay sang dalan kag taytay, kasubong man learning facilities ukon buluthuan.
Sarang man ini magamit sa social protection program kag agrikultura.
Panindugan ni Lacson nga dapat sundon kun ano ang gintalana nga purpose sang magsumiter sang report.
Sa karun wala pa nahibaluan kun san-o madownload ang pondo.
