Ginapakamaayo sang Presidente sang Liga ng mga Barangay sa ciudad sang Bacolod nga gindeklarar sang Korte Suprema nga constitutional ang 5-years term para sa Barangay kag Sangguniang Kabataan officials.
Sa interview sang Bombo Radyo Bacolod kay Punong Barangay Lady Gles Pallen, Punong Barangay sa Brgy Taculing, Bacolod City, 2023 pa ang ulihi nga eleksyon kag aminado ini nga nabudlayan sila bangod duha lamang ka tuig ang ila kuntani nga termino.
Gani para sa duha ka tuig ang ila nga napreparar nga mga proyekto, apang nag-extend sang isa pa ka tuig, gani gindugangan man nila ukon plano.
Karun nga madugangan naman sang duha pagid ka tuig, magahimo naman sila sang panibag-o nga plano para sa pagpadayun sang pagserbisyo.
Apang sa pihak sini, ginapakamaayo ni Pallen nga fixed na sa lima ka tuig ang ila termino, gani para sa lima ka tuig na sa masunod ang iplastar nga mga proyekto.
Suno kay Pallen, sa nakaligad nga tatlo ka tuig nga termino, ang una nga tuig para sa mga bag-o nga opisyal ang para sa pagtuon pa lamang kag nagapangita sang mga assets.
Sa ikaduha nga tuig pa masuguran gid ang nagakaigo nga implementasyon, apang sa ikatatlo nga tuig, may-ara naman nga preparahan nga eleksyon.
Ang Punong Barangay ang indi kaangay sa mga City officials, bangod sa ciudad bisan magbag-o ang alkalde, ang mga department heads ang nagapabilin gihapon, samtang sa Barangay, sa pagbag-o sang Punong Barangay nagabag-o man ang Barangay Secretary kag Treasurer, nga kinahanglan paman magtuon.
Gani para sa iya nagakaigo gid nga gin-extend sa lima ka tuig ang termino para mas matuman nila ang ila mandato.
Apang bangod duha nalang ka terms, ang mga yara na sa ila ikaduha nga termino ang indi na pwede magpapili sa 2028 Elections, kalakip na si Pallen.
Ang makapapili na lamang sa 2028 amo ang mga nagapungko sa karun nga first termer.
Sa pihak nga bahin, nagapati ini nga ginatun-an na sang Commission on Elections kag national government kun paano malikawan ang problema sa madamo nga mga SK officials nga nag-asawa ukon may kabataan na.
