Ginlatag sang Punong Barangay sa Brgy Taculing, Bacolod City, ang mga prayoridad sini sa dugang nga duha ka tuig sa serbisyo kasunod sang pagdeklarar sang Korte Suprema nga constitutional sa layi nga nagapatuman sang 5-year term sang mga Barangay kag Sangguniang Kabataan officials.
Sa interview sang Bombo Radyo Bacolod kay Punong Barangay Lady Gles Pallen, tuyo sini nga matukod kag matapos ang bag-o nga Barangay Hall.
Suno diri, padayun nga nagadako ang populasyon sang ila Barangay gani kinahanglan man nga ma-expand ang ila administrative function.
Bilang Presidente sa Liga ng mga Barangay sa Bacolod City, pahanumdom niya sa mga Barangay kag SK officials nga indi dapat iselebrar ang paglawig sa serbisyo.
Sa baylo, dapat ini ang magserbe nga rasun sa pagdoble pa sang effort, kag ipakita sa mga pumuluyo nga sila ang deserving sa ginhatag nga kahigayunan.
Nagalaom man ini nga mapatuman sang maayo sang mga Punong Barangay ang mga national kag local projects, kag magsunod sa requirement sang Department of the Interior and Local Government (DILG).
Pahanumdom pa ni Pallen nga malawig pa ang eleksyon, gani dapat nga ipahigad na ang away sa politika sa tunga sang Punong Barangay kag mga Kagawad, kag magbuligay sa pagserbisyo sa mga pumuluyo.
Bentaha para sa Punong Barangay sang Brgy Mandalagan, Bacolod City bilang first termer ang desisyon sang Korte Suprema nga nagapalig-on sa layi nga nagadeklarar sang 5-years term para sa Barangay kag Sangguniang Kabataan officials.
Sa interview sang Bombo Radyo Bacolod kay Punong Barangay Paul Anieve, ginklaro na sang Korte Suprema nga constitutional ang layi bangod ini ang term fixing kag indi postponement sang Brgy and SK Elections, nga amo ang makabig ‘unconstitutional.’
Pahayag sini nga ang Department of the Interior and Local Government (DILG) ang nagapangayo sang 5-Year program para sa mga Punong Barangay apisar nga sang nakaligad tatlo lamang ka tuig ang termino.
Apang aminado si Anieve nga ang mga second termer sa karun ang indi na mahimo makapapili sa 2028.
Ini bangod indi kaangay sa tatlo ka tuig nga termino nga sarang mapalaba sa tatlo ka term of office, sa 5-year term duha na lamang ang maximum term of office sang opisyal.
Pasalig niya nga sila sa Brgy Mandalagan ang magatrabaho sang maayo mapostpone man ukon indi ang eleksyon sa pagpati nga sila ang botohon gihapon sang pumuluyo kun makita nga nagatuman sang ila obligasyon.
Suno diri, siya ang pabor nga mapalawig sa lima ka tuig ang termino bangod bilang bag-o nga Punong Barangay, napamatud-an sini nga ang una nga tuig ang mahulog lamang sa mga seminars, kag bisan sa ikaduha nga tuig mabudlay pa gihapon sa ila nga makabisado ang budgeting process
Samtang sa ikatatlo nga tuig, matunga naman ang atensyon sa eleksyon.
Samtang sa lima ka tuig nga termino, sila ang mahatagan gid sang kahigayunan nga makaperform sang maayo.
