Gintindugan sang Alliance of Concerned Teachers – Negros Island Region Union nga indi solusyon ang pagrekomendar sang pagsuksok sang sando kag pagpatigatigayon sang kanselasyon sang face-to-face classes karun nga may Super El Niño.
Sa interview sang Bombo Radyo Bacolod kay ACT-NIR Union Secretary General Grace Abellar, ang rekomendasyon ang band-aid solution lamang.
Pahanumdom niya nga magalawig ang Super El Niño kag maapektuhan ang kalidad sang pagtuon kun masami nga ginasuspend ang face-to-face classes.
Pahanumdom ni Abellar nga lain gid ang kalidad sang pagtudlo sa face-to-face classes sangsa Alternative Delivery Mode.
Kun may-ara naman sang face-to-face classes kag pasuksukon lamang sang sando ang mga estudyante, indi man gihapon madula ang init kun wala ma-address ang problema sa ventilation.
Panindugan ni Abellar nga kinahanglan sang long-term solution kaangay sang paghatag sang nagakaigo nga ventilation sa mga eskwelahan kaangay sang electric fan ukon aircon.
Gingamit sini nga palaanggiran ang nagluntad nga mga pagbaha sang tinalikdan kun sa diin apisar nga wala gid napainan sang pundo, ginhatagan sang prayoridad agud masolusyunan ang ginapangatubang nga problema.
Suno kay Abellar, problema man sa karun sa pagtuon ang Super El Niño nga dapat ma-address bangod kun mapabay-an mahimo magnubo ang kalidad sang edukasyon sa Pilipinas.
Aminado ini nga ang Alternative Delivery Mode ang ginpatuman agud indi ma-untat ang pagtudlo sa kabataan, apang nagapati si Abellar nga may mga puluy-an nga mas mainit pa sa eskwelahan gani sila ang indi gihapon makaconcentrate.
Dugang pa sini nga mas madamo pa ang ulubrahon sang mga kabataan kun tanan nga walo ka subjects ang may ipadala nga exercises.
