Luwas nga na-rescue ang 22 ka mga pasahero matapos nagkapan ang ginsakyan nga motorbanca sa ciudad sang Sipaway Island sa ciudad sang San Carlos sang tinalikdan nga Nobyembre 6.
Ang mga nag-rescue sa mga ini ang kapitan kag tripulante sang motorbanca.
Sa interview sang Bombo Radyo Bacolod kay Ensign DenDen Flores, Subtstation commander, Coast Guard Sub Station-San Carlos, may nagpahibalo sa ila nga may maritime incident kag madasig man nga nagresponde ang Deployable Response Group sang Coast Guard kaupod ang Maritime Police.
Suno kay Flores, pag-abot sang response team, hilway na nga na-rescue ang 22 ka pasahero nga ginalakipan sang 11 ka mga adults kag 11 ka mga menor de edad.
Ginalantaw sang Coast Guard nga ang mga dalagko nga balod ang isa ka rason sang pagkapan sang motorbanca.
Ang insidente ang nagluntad sa port sang Sipaway Island nga gilayon man nga na-rescue ang mga pasahero.
Suno kay Flores, sa karun maayo na ang kahimtangan sang mga pasahero kag nakapauli na sa ila mga puluy-an.
Ginpasalamatan ni Flores ang tanan nga nagbulig sa rescue operations kag nagpahanumdom sa tanan nga sea travellers kag mga mangingisda nga lantawon ang tiempo antes maglayag agud malikawan ang maritime accident.
