Ginapasalamatan sang Station Manager sang Bombo Radyo Bacolod ang tanan nga mga blood donors nga nagbuylog sa tuigan nga blood donation drive sang Bombo Radyo Philippines, upod sa
Bombo Radyo Philippines Foundation, Inc. kag Philippine Red Cross nga “Dugong Bombo 2026: A little pain, A life to gain”.
Kaina alas-9:00 sang aga na sang napasulod ang mga aspiring blood donors matapos magpagwa sang instruction ang management sang City Mall Mandalagan nga sundon na lamang ang natalana nga oras sang pagbukas sang mall para sa safety sang mga tenants.
Apang apisar sini nagtinir kag naghulat gid ang mga aspiring blood donors nga ang iban pasado alas-5:00 sang aga yara na nagapila sa gwa sang mall.
Gani ginapasalamatn gid ni Bombo Daniel Lecciones sa mga blood donors, mapa-dugay na nga nagadonar ukon first-timer.
Pahanumdom niya nga ang tawo ang kaangay sang salakyan nga kinahanglan mag-change oil, ang dugo sang tawo ang dapat nga gina-islan man, nga mahimo paagi sa blood donation.
Gani pangabay sini nga mas mabatyagan pa sang mga nagdonar ang importansya sang pagpakuha sang dugo, kag ini ang maka-engganyo pa sa iban.
Dugang pa sini nga ang dugo nga gindonar, ang mabangko na sa pangalan sang mga donors, gani ini ang sarang makasugpon sang kabuhi, sang donor, iya pamila, ukon abyan, sa mga tion sang emerhensya.
