Nagpasalamat ang blood galloner sang Bombo Radyo sa chairman sang Bombo Radyo Philippines nga si Dr. Rogelio M. Florete bangud sa pagdihon sang proyekto nga Dugong Bombo nga nagahandum nga makabulig sa tawo.
Si Leonard Diamante Malaluan, 48-anyos, residente sang Barangay II, La Carlota City, Negros Occidental ang 19 na ka tuig nga nagadonar sang dugo sa Dugong Bombo.
Avid listener sang Bombo Radyo si Malaluan halin sang gamay pa ini.
4th year college pa lang siya sang nagsugod siya sa pagdonar sang dugo sang tuig 2005.
Sang amo nga tion, manug-graduate sa BS Agriculture sa La Carlota City College si Malaluan kag bangud sa challenges sa thesis, indi stable ang iya blood pressure.
Gani ginpromisa niya sa kaugalingon nga magadonar ini sang dugo kun magnormal na ang iya blood pressure.
Sa sulod sang 21 ka tuig, kaduha lang ka beses nag-absent si Malaluan.
Iya naman ginpromisa nga magadonar ini sang dugo samtang masarangan sang lawas.
Magluwas nga mamag-an ang pamatyagan, nalipay si Malaluan nga makadonar sang dugo bangud makabulig ini sa mga pamilya nga naga-daang sa pagpangita sang dugo.
Ang mga blood card nga iya nakuha ang ginahatag niya sa mga nagakinahanglan kag may mga tinion man nga siya mismo ang nagakuha sini sa Philippine Red Cross agud mahatag sa pasyente sa ospital.
Ginpaambit sini ang indi niya malipatan nga eksperyensya kun sa diin may isa ka iloy nga may bata nga may cancer nga nagakinahanglan sang dugo gani siya mismo ang nagkuha sang dugo sa blood bank bangud wala sang iban nga binangi ang iloy.
Nabuligan man ni Malaluan ang amay sang cancer patient bangud nagkinahanglan man ini sang dugo.
Nagpasalamat si Malaluan sa chairman sang Bombo Radyo Philippines nga si Dr. Rogelio M. Florete sa proyekto nga Dugong Bombo bangud dako ini nga bulig sa mga nagakinahanglan.
Nagpanawagan man ini sa mga eligible magdonar nga maghingalit gid sa pagdonar sang dugo agud nga may stock na para sa miyembro sang pamilya.
Si Malaluan ang isa ka contract of service employee sa Bureau of Plant Industry National Seed Quality Control Services sa La Carlota City.
