Ginpanindugan ni Bacolod City Lone District Representative Alfredo ‘Albee’ Benitez nga wala sang may nagbag-o sa Team Asenso kag wala sang may nagpahalin kay Councilor Homer Bais sa ila grupo.
Suno kay Cong Albee, indi kinahanglan nga hatagan sang importansya ang pangalan sang grupo bangud para sa iya ‘irrelevant’ ini basta ang importante amo ang direksyon kag ang plano nga ila gin-ugyunan sang sila ang nagpirma sang manifesto sang 2022.
Dugang pa sang Kongresista, wala sila nakahibalo kun ano ang mangin plano ni Bais kag wala man ini na-istoryahan sang grupo.
Apang dapat suno sa iya, pamatian ang collective decision sang grupo.
Sa pihak sini, ginpahayag ni Cong. Albee nga magatutok sila sa pagtrabaho kag pagserbisyo sa mga pumuluyo.
Sa kaangot nga balita, nagapati si Bacolod City Councilor Homer Bais nga indi na kumportable ang iya mga kaupdanan nga konsehal sa Team Asenso nga mag-upod siya sa grupo kasunod sa natabo nila nga komosyon ni Congressman Alfredo Albee Benitez.
Sa interview sang Bombo Radyo kay Bais, bisan pa man sa ila nga pannindugan wala sila naga-sinanto-anay gani wala sang rason nga siya ang mag-upod pa sa grupo.
Sa pihak sini, para sa iya dapat mangibabaw sa gihapon ang ila nga ginsumpaan bilang mga public official nga unahon ang pumuluyo.
Sa pihak nga bahin, ginpahayag ni Bais nga wala sang dapat ipabugal sa sitwasyon sang legislative building.
Ini bangud suno sa iya, dapat sang Hunyo 2025 pa natapos ang amo nga proyekto.
Suno kay Bais, wala sa gihapon naklaro ang dalagan sa loan sang ciudad.
Luyag sini nga ipahanumdom sa Team Asenso nga may sinumpaan sila nga dapat pagahimuon kalakip na diri ang transparency kag accountability.
Nagalaum naman ini nga ma-aprubahan sang National Commission on Audit ang request sang duha ka grupo nga ginlakipan sang Task Force Kasanag kag Joint Civil Society Coalition nga special audit sa Legislative Building.
Nagapati si Bais nga upod niya sa iya panindugan ang mga Bacolodnon nga mahatagan sang hustisya ang ila tax nga ginabayad sa gobyerno.
