Nagapaandam ang Sangguniang Panlungsod sa ciudad sang Bacolod sa publiko nga maghalong sa digital scam karun nga nagahilapit ang holiday season.
Sa interview sang Bombo Radyo Bacolod kay Councilor Em Ang, madamo na sila sang nabatun nga mga report tuhoy sa mga nabiktima sang scams kag fraud partikular na sa digital banking kag electronic wallet.
Ilabi na karun nga kadam-an sa mga financial transactions ang ginapaagi na online.
Isa man sa posible nga matabo amo ang pagpadala na lamang sang mga maninay kag maninoy sa ila ihado kag ihada sang kwarta paagi sa e-wallet.
Sa resolusyon nga ginpasar sang City Council, sila ang nagapahanumdom sa publiko nga maghalong sa pagsend sang kwarta.
Ini bangod sa posibilidad nga may manggamit sang identity sang iban agud makapangscam kaangay sang pagpangayo sang kwarta ukon load.
Pahanumdom sini nga indi gid pag-ishare sa iban ang pin code.
Indi man pag i-click ang makaduluda nga link, bangod mahimo nga makuha ang personal nga impormasyon.












