Ginpatpat ni Governor Eugenio Jose “Bong” Lacson ang iya nga 7-point development agenda nga “Abanse Negrense” sa gin-patigayon nga sesyon sang Sangguniang Panlalawigan kahapon sa Kapitolyo Probinsyal.
Ang “Abanse” ang naga-kahulugan sang mga programa ni Lacson nga amo ang Agriculture and Food Security; Building of infrastructures and road and others infrastructures; Advancement of Economic, Trade, Investment, and Employment Opportunities; Nurturing of Public Health by Creating Responsive Hospital and other Social Services; Sustainable Environmental Management and Tourism Development; kag ang Education, Culture, Sports and ICT, samtang naga-kahulugan naman ang “Negrense” sa Negrense Brand of Good Governance and Human Development.
Suno kay Lacson, iya sa gihapon padayunon ang mga programa ni anay Governor Alfredo Marañon Jr. ilabi na sa patag sang edukasyon paagi sa paghatag sang scholarship program sa mga naga-kadapat nga estudyante nga luyag makatapos sang ila pag-eskwela.
Nag-apelar man ini sa tanan nga mga Board Members nga buligan ang iya nga administrasyon nga ma-implementar ang nagkalain-lain sini nga proyekto, subong man sa mga empleyado sang Kapitolyo kag sa tanan nga mga Negrense nga suportahan kag mag-kooperar agud sa kaayohan sang Negros Occidental kag sang tanan.
Samtang, gin-pasiguro naman ni Vice Governor Jeffrey Ferrer nga indi gid nila pagpabay-an sang mga Board Members si Lacson.
Ila man himuon ang tanan agud mahatagan man sang manami nga serbisyo ang mga Negrense.
