Pito ka indibidwal ang napatay kalakip na ang apat ka tuig nga bata matapos ang airstrike sang Israel sa bahin sang Lebanon kahapon, suno sa health ministry defense.
Sa magkatuhay nga pag-atake sa Beirut, apat ka tawo ang napatay kag 39 ang pilason matapos maigo ang isa ka residential area.
Kadungan ini sang pagselebrar sang mga Kristyano sa Lebanon sang Easter Sunday, apang nangin madugo ini nga adlaw.
Ginabanta indi magnubo sa walo ka airstrike ang nag-igo sa southern suburbs sang capital, suno sa state media.
Mas timprano man gin-anunsyar sang Lebanese army nga isa ka sundalo nila ang napatay sa isa pa ka airstrike sang Israel sa nabagatnan nga bahin sang Lebanon.
Nagpagwa ang Israel sang evacuation warning sa isa ka nagapanguna nga border crossing sang Lebanon padulong sa Syria, nga ginaalegar ginagamit sang grupo nga Hezbollah para sa operasyon militar.
Naulamid ang Lebanon sa mas nagalala nga gyera sang Middle East matapos mag-umpisa ang rocket attacks sang Hezbollah batok sa Israel sang nakaligad nga Marso 2.
Humalin sadto, asod-asod na nga airstrike sang Israel ang ginlunsyar sa pungsod kag kalakip na ang ground invasion.
Suno sa Lebanese health ministry, nagdangat na sa 1,461 ang kabug-usan nga numero sang mga napatay sa mga pag-atake sang Israel, kag masobra isa ka milyon ang nag-evacuate.
