May-ara sang pahanumdom ang bise alkalde sa ciudad sang Bacolod sa tanan nga public officials kasunod sang duha ka mga empleyado sang ciudad nga gindagdagan sang show cause order bangod sa pagbaton sang bayad kag pagserbe nga fixer.
Madumduman nga ang duha ka empleyado ang gikan sa Bacolod Environment and Natural Resources Office (BENRO) nga nagbaton sang P40,000 kag City Treasurer’s Office nagbaton sang P12,000 kabaylo sang pagproseso sang ila mga gina-asikaso sa ciudad.
Sa interview sang Bombo Radyo Bacolod kay Vice Mayor El Cid Familiaran, acting mayor sa Bacolod City, may ara sang Civil Service Law nga nagaprotekta sa kinamatarong sang mga government employees.
Pinaagi sini, ang duha ang mahatagan sang due process, ginpadal-an sang memorandum kag kinahanglan nga maghatag sang eksplinasyon kun ngaa sila ang indi dapat masuspender ukon mapahalin sa serbisyo.
Apang kun mabaskog gid ang ebidensya sa nakumiter nga sala, depende sa gravity sang violation sila ang mahimo masuspend ukon materminate.
Ginakasubo ni Familiaran nga makanugon lamang ang kalabaon sang ila nangin serbisyo kag indi mabatun ang retirement fee sa ulihi.
Pahanumdom sini nga indi dapat ibaylo ang trabaho para lamang sa gamay nga kantidad.
Dugang pa sini nga ang mga public servant ang ginaswelduhan sang pumuluyo gani dapat magtrabaho sang husto kag indi intuon ukon hatagan sang problema ang nagapasweldo sa ila.
Aminado ini nga iban sa mga pumuluyo ang natamad naman magpila, ukon masako gani naga-avail sang serbisyo sang fixer, apang pahanumdom sang bise alkalde nga ini ang sala kag dapat disiplinahon ang kaugalingon.
Iban sa mga fixer ang nagatanyag sang bayad kabaylo sang pagpadasig sang pag-asikaso sang papelis, ukon agud mapalusot bisan kulang sang requirements.
Pahayag ni Familiaran nga apisar may kalawigon ang proseso mas maayo gid nga macomply ang tanan nga proseso kag mga requirements.
Isa man sa ginatulok sini nga mahimo mahatagan sang special lane ang mga call center agents nga kun kis-a naga-avail na lamang sang fixer agud makapahuway sang temprano ilabi na nga gab-i ang ila nga trabaho.
