Bangud 40 na ka tuig nga wala na sang komunikasyon sa iya mga utod, emosyonal nga nagpanawagan sa Bombo Radyo ang isa ka 54-anyos nga babayi agud mapahibalo sa iya mga kautoran nga buhi pa ini.
Sa interview kay Editha Diaz Bedia, tumandok sang Binalbagan, Negros Occidental kag yara na subong nagapuyo sa Purok Ilang-Ilang, Sultan Kudarat, 40 ka tuig na nga wala sila nakakitaay sang iya mga utod nga sanday Norberto Diaz, Nelia Diaz Arroz, kag Johnny Diaz.
Ginsaysay sini sa Kahapon Lamang Program (upod si Bombo Jaz de Jesus-Madrigal) nga nagpadulong siya sadto sa Manila agud magtrabaho tubtub nga wala na ini nakabalik pa sa Negros.
Nagpadulong sa Sultan Kudarat si Bedia kag didto na siya nakatukod sang iya kaugalingon nga pamilya.
Masami man siya nga nagapadala sang sulat sa iya mga kautoran apang wala sang sabat tubtob man nga nadula na gid ang ila komunikasyon.
Luyag sa karun ni Editha Diaz Bedia nga makit-an niya liwat ang iya mga utod antes pa man ini madula sa kalibutan.
Suno sa iya, wala gid sang adlaw nga wala niya gina-paminsar ang iya mga himata kag tuman gid sini nga ka-palangga ang iya mga utod.
Naga-panawagan ini nga kun sino man makabati nga nakakilala sa iya mga utod mahimo siya nga tawgan sa numero nga 09557269322 ukon mag message sa facebook page sang Bombo Radyo Bacolod.
