Bangod sa agaway sa pwesto sa pagpasaka sang pasahero ang ginalantaw nga rasun sa pagtiro sang barker sa kaangay nga barker malapit sa Libertad Public Market sa Mabini Street, Brgy 40, Bacolod City kapin alas-3:30 kaina sang kaagahon.
Ang biktima ang ginkilala nga si Alyas Rolando, 39 anyos, single, residente sang Brgy 38, Bacolod City; samtang ang suspect ang ginkilala naman nga si Alyas Roger, single, residente sang Brgy Taculing, Bacolod City.
Sa interview sang Bombo Radyo Bacolod kay Police Captain Peter John Ramos, officer in charge sang Bacolod Police Station 6, matapos ang pagbaisay sang duha sa pwesto sa pagpasaka sang pasahero, gintabog sang suspect ang biktima.
Apang sang ini ang naghalin na, ginsundan man ini sang suspect kag gintiro sang magdangat na sa malapit sa University of Negros Occidental – Recolletos.
Ang biktima ang nag-agom sang samad sa kilid kag sa paa, kag sa karun padayun pa nga ginabulong sa ospital.
May-ara man sang pulis sa nasambit nga merkado, apang wala naabtan ang suspect.
Nagapatigayon man gilayon sang hot pursuit operation apang suno kay Ramos, nakaangkon sang kabudlayan matapos nga sala ang ginhatag nga impormasyon sa mga otoridad.
Suno diri, may nagsugid sa mga pulis nga nagasakay sa tricycle ang suspect, nga amo man ang ila ginpangita, apang sa ulihi nahibaluan nga ini ang sakay sa e-bike.
Ang suspect ang mahimo mangatubang sang kaso nga frustrated homicide.
