Nagapanawagan si Agri Partylist Representative Wilbert Lee nga padasigon ang imbestigasyon sa mga opisyal sang National Food Authority (NFA) nga imbulbado sa pagbaligya sang rice stocks sang pungsod sa mga traders.
Sa interview sang Bombo Radyo Bacolod kay Lee, aminado ini nga naakig siya sang mahibaluan ang natabo bangod madamo sang pumuluyo ang nagahangla sang barato nga bugas, sa baylo ini ang ginbaligya nga pierdida sa mga traders.
Suno diri P39.50 ang kuha sang NFA sa mga local farmers sang bugas samtang ini ang ginbaligya lamang sa traders sa P25 sa traders kag ginabaligya naman sang mga traders sa mga konsumidor sa mas mahal nga presyo.
Pahayag sini nga nagadangat na sa masobra P100 million ang kapierdihan sang gobyerno.
Panawagan sang kongresista nga kuntani mapadasig ang imbestigasyon sa 141 nga mga NFA personnel nga ginalakipan sang 98 ka warehouse supervisors, 27 ka branch managers kag 12 ka regional managers nga ginsuspender agud matumod ang mga matag-as nga opisyal nga may salabton, samtang mapabalik naman sa trabaho ang mga empleyado nga napilitan ukon no choice kundi ang magtuman sang mandato gikan sa mataas nga mga opisyales.
Panindugan man sini nga indi na importante kun ginhungod ukon napilitan lamang ang pagbaligya sang buffer stocks sang bugas, bangud ang natabo ang nagapakita gid lamang sang gross negligence sa mga opisyales.
Suno diri, kun may-ara sang barato nga bugas ang NFA, mas maayo nga ini ang ibaligya na lamang sang barato sa mga pumuluyo sangsa ibaligya sa traders sa nagapamierdihan nga presyo.
Sa pihak nga bahin, panugyan man sini nga ireview ang charter sa kun ano ang nagakaigo nga pagdispose sang mga stock sang bugas nga sarang pa makunsumo.
Suno diri, nakapagkit nga ang magadesisyon sa disposal amo ang NFA Council, apang wala napatpat ang maathag nga proseso.
Panindugan ni Lee nga indi husto nga ihambal nga ginasunod na lamang kun ano ang nakaandan ilabi na kun ini ang maathag nga nagalapas sa layi.
Pahanumdom sini nga ang mandato sang NFA amo ang pagsiguro sang kaayuhan sang mga mangunguma, konsumedor kag ang pagseguro nga may nagakaigo nga buffer stocks ang pungsod.
